ئه‌ساسنامه‌

ئامانجه‌کانی کۆمه‌ڵه‌ی سه‌ربه‌خۆی ژنانی کورد له‌ ئۆپسالا

ئه‌گه‌رکوو تا ماوه‌یه‌ک له‌مه‌و پێش که‌مایه‌تی نه‌ته‌وه‌ی کورد له‌ سۆئێد به‌ خه‌باته‌ قاره‌مانا‌نه‌که‌یان له‌ دژی دیکتاتۆری ناوچه‌کان ده‌ناسران، ئه‌مرۆ به‌ داخه‌وه‌ نێوی کورد له‌ سۆئێد به‌ قه‌تڵه‌کانی نامووسی و ئازار و ئه‌شکه‌نجه‌ و به‌رته‌سککردنی مافی ژنان و کچانی کورده‌وه‌ ده‌لکێنرێت. له‌ڕاستیدا قه‌تڵی نامووسی کچان گه‌نجی کورد خۆی به‌ڵگه‌یه‌که‌ له‌ سه‌ر قه‌یران و خۆسازگارنه‌دانی کورد‌ له‌ سوئێد. له‌ ژێر ئاڵای سوننه‌ت و ئایین و فه‌رهه‌نگی بنه‌ماڵه‌کانی کورد ، ژنان و کچان هه‌ست به‌ فشاری جۆراوجۆر ده‌که‌ن. به‌داخه‌وه‌ ته‌نیا ئه‌م” فه‌رهه‌نگ” ه‌ی کورده‌ که بۆته ئاوێنه‌ی‌ باڵانوێنی ناسنامه‌ی فه‌رهه‌نگی کوردی دانیشتووی سوئێد. ‌

یه‌کێک له‌ هۆکاره‌کانی ڕێگری به‌شداری ژنان له‌ کۆمه‌ڵگه‌ و ئازادییان،‌ گیروبه‌نده‌کانی دواکه‌وتوویی فشاره‌کانی قه‌ومییه‌. به‌هۆی چڕژی ڕاده‌ی په‌نابه‌ران به‌تایبه‌تی په‌نابه‌رانی کورد له‌ سێ گه‌ڕه‌کی تایبه‌ت له‌ ئۆپسالا، بۆته‌ هۆی په‌ره‌گرتنی ئه‌م خۆسازگارنه‌دانه‌. ژنان و کچانی کورد به‌ هۆی ئه‌م جۆره‌‌ په‌یوه‌ندییانه‌ و هه‌لومه‌رجه‌کانی ژیان به‌ ته‌واوی له‌ ژێر کۆنترۆڵ ئه‌ندامانی بنه‌ماڵه‌ و قه‌وم و که‌سوکاروئه‌ود‌ۆستانه‌یانن که‌ له‌م گه‌ڕه‌کانه‌دا ده‌ژین. ئه‌مجۆره‌ کۆنترۆڵه‌ گشتییانه‌، ئازادی کچانی گه‌نج له‌ هه‌ڵبژاردنی جۆری کراس، په‌یوه‌ندییان له‌ ته‌ک دۆست و مافی هه‌ڵبژاردنی حه‌زی کوڕ و…هتد لێ چه‌وت ده‌کاته‌وه‌ و ژیانیان لێده‌کاته‌ جه‌هه‌ننه‌میک.‌ ئه‌گه‌ر له‌گه‌ڵ ئه‌مجۆره‌ ژیانه‌ هه‌ڵنه‌که‌ن ده‌که‌ونت ژێر ئازار و توندوتیژی.

به‌داخه‌وه‌ تا ئێستا هه‌نگاوێکی ئه‌ساسی بۆ ئاڵوگۆڕی ئه‌م ڕه‌وته‌ و باشترکردنی هه‌لومه‌رجی ژنان و کچان له‌ شاری ئۆپسالا‌ هه‌ڵنه‌هێنراوه‌ و چ نه‌هاد و ئۆرگانێک پێک نه‌هاتووه‌ بۆ ئه‌وه‌ی‌ ئه‌رکی پێکهێنانی ئا‌ڵوگۆری جۆری تێڕوانین و بیرکردنه‌وه‌ له‌ سه‌ر وه‌زعی ژنان و کچان بخاته‌ ده‌ستووری کاری رۆژانه‌ی خۆی. ئێمه‌ پێمانوایه‌ گۆڕانی ئه‌م ڕه‌وته‌ ئه‌رکی سه‌رشانی هه‌موو ژن و پیاوێکی ئازادیخوازه و‌ باوه‌رمان به‌ مافی یه‌کسانی ژن و پیاوه‌. به‌م هۆیه‌وه‌ کۆمه‌ڵه‌ی سه‌ربه‌خۆی ژنانی کورد له‌ ئۆپسالا دامه‌زرانی خۆی ڕاده‌گه‌یه‌نێت تا له‌ڕێی گه‌یاندنی زانیاری بۆ ژنان و پیاوانی کورد بتوانێت له‌ تێکشکانی ئه‌م ڕه‌وته‌ و ڕزگاریان له‌ گیروگرفته دواکه‌وتووه‌کان و هه‌روه‌ها خۆڕاهێنانیان له‌ گۆمه‌ڵگای سۆئێد و پێکهێنانی هه‌لومه‌رجێکی ئازادتر بۆ ژنان و کچانی کورد، رۆڵی هه‌بیت.

ئیـمه‌ له‌ سه‌ر ئه‌م باوه‌ڕه‌ین ژنان و گه‌نجانی په‌نابه‌ر له‌ ژێر فشاری فه‌رهه‌نگی و ئاینی دان و پێویستیان به‌ یارمه‌تی ئێمه‌ هه‌یه‌ بۆ ڕزگارییان له‌م جۆره‌ فشارانه‌.

کۆمه‌ڵه‌ی سه‌ربه‌خۆی ژنانی کورد له‌ ئۆپسالا به‌ بێ له‌ به‌ر چاوگرتنی جینس و چین و ئایین و ئایدپلۆژی سیاسی و ڕابردوو و هۆگرایه‌تی قه‌ومی و فه‌رهه‌نگی، باوه‌ڕی به‌ مافه‌ نه‌ته‌وه‌ییه‌کانی مرۆڤ و یه‌کسانی له‌م مافانه‌دا هه‌یه‌.

کۆمه‌ڵه‌ی سه‌ربه‌خۆی ژنانی کورد له‌ ئۆپسالا له‌ سه‌ر ئه‌م باوه‌ڕه‌یه‌ که‌ هیچکات ناگونجێت به‌ هۆی گرێدراوی قه‌ومی یان داب و نه‌ریته‌کانی ئایینی و فه‌رهه‌نگی زاڵ به‌ سه‌ر بنه‌ماڵه‌دا، یان هه‌لومه‌رجی ده‌وروبه‌ری بنه‌ماله‌ ئازادییه‌کانی تاکه‌که‌س چه‌واته‌ بکریت یان خود مافه‌کانی یاسایی و عورفی که‌س ته‌سک بکرێته‌وه‌.

ئێمه‌ له‌ سه‌ر ئه‌م باوه‌ڕه‌ین که‌ مافی هه‌ر ژن و پیاوێکه‌‌ ئازادانه‌ له‌ سه‌ر شێوه‌ی ژیانی خۆی بڕیار بدات و ئازادانه‌ هاوسه‌ر هه‌لبژێرێت و ئازادانه‌ زه‌ماوه‌ند بکات. ئه‌مه‌ به‌م مانایه‌یه‌ که‌ ئیمه‌ چالاکانه‌ له‌ دژی ئه‌و داب و نه‌ریتانه‌ ڕاده‌وه‌ستین و خه‌بات ده‌که‌ین که‌ ‌ جیاوازی داده‌نێن و که‌سایه‌تی تاکه‌که‌س له‌ ڕێی به‌ شوودانی به‌ زۆر و قه‌راردادی، خه‌ته‌نه‌ی ژنان و توندوتیژی و گرژی له‌ چۆارچێوه‌ی بنه‌ماڵه‌دا تێکده‌شکێنن. ‌

کۆمه‌ڵه‌ی سه‌ربه‌خۆی ژنان له‌ ئۆپسالا له‌ سه‌ر ئه‌م باوه‌ڕیه‌‌ وتوویژ و گواستنه‌وه‌ی بیر و ڕاو گه‌یاندنی زانیاری راست و دوور له‌ سانسۆر هه‌روه‌ها تۆژینه‌وه‌ی ئازاد له‌ سه‌ر ئه‌و میکانیزمانه‌ی‌ که‌ ده‌بنه‌ هۆی جیاوازی ژنان وگه‌نجان، رۆڵی بنه‌ڕه‌تییان له‌ سه‌ر خه‌باتی دژی ئه‌م نابه‌رابه‌رییانه‌ هه‌یه‌. ئه‌م کۆمه‌ڵه‌یه‌ مافی ئازادی ئایین و پاراستنی داب و نه‌ریته‌کانی قه‌ومی و فه‌رهه‌نگی به‌ واته‌ی یه‌کێک له‌ مافه‌کانی مرۆڤ، به‌ ڕه‌سمییه‌ت ده‌ناسێت، به‌لآم له‌ هه‌مان کاتیشدا ڕه‌وا نابینێت که‌ زانیاری و ووتووێژ له‌ سه‌ر بابه‌تی جیاوازی جینسی له‌ ژێر ئاڵای ڕیزدانان به‌ ئایین و فه‌رهه‌نگ و پاراستنیان، ته‌سک بکرێته‌وه‌.

ئه‌م کۆمه‌ڵه‌یه‌ ئاگاداری بوونی ئه‌و میکانیزمه‌ جیاوازیخوازنه‌ی کۆمه‌ڵایه‌تی و ئابووری و سیاسیه‌ که‌ که‌مایه‌تییه‌ کانی قه‌ومی و دینی له‌ کۆمه‌ڵگه‌ جیا ده‌کاته‌وه‌ و دووره‌ په‌راوێزی کۆمه‌ڵگه‌یان ده‌کات. ئه‌م کۆمه‌ڵه‌یه‌ هاوکات که‌ دژی جیاوازی، فشار و نه‌ژادپه‌ره‌ستی به‌ ته‌واوی هێزه‌وه‌ ڕاده‌وه‌ستیت، چ کات ڕێ نادات که به‌ڵگه‌کانی جیاوازی سیاسی و ئابوری و کۆمه‌ڵایه‌تی ببنه‌ که‌ره‌سته‌یه‌ک بۆبه‌ ڕه‌وا دانان یان خود داپؤشاندنی جیاوازیی جینسی. ‌

Comments are closed.